Поранешниот министер за финансии, Кирил Миноски, преку опсежна анализа објавена на социјалните мрежи, упати остра критика за начинот на кој денес се перципира и се практикува политиката во нашето општество. Тој предупредува дека наместо визија за развој на државата и грижа за општото добро, политичкото дејствување сè повеќе се поистоветува со теснопартиски и лични мотиви.
Според Миноски, политиката во современи услови ја изгубила својата примарна цел. Државата сè почесто се третира како „приватна фирма“, а политичките процеси се претворени во суров механизам за контрола и злоупотреба на државните ресурси, каде што главниот двигател се профитот и задржувањето на моќта.
„Политиката денес најчесто ја спомнуваме во негативен контекст како синоним за остварување на лични, фамилијарни или клановски интереси“, пишува поранешниот министер.
Правејќи паралела со минатото, тој се навраќа на историското и филозофското сфаќање на овој поим. Миноски потсетува дека уште од времето на Аристотел, политиката била дефинирана и разбрана како возвишена активност, чија единствена цел е создавање подобар живот и правилно уредување на заедницата – концепт кој, според неговата анализа, е во целосна спротивност со денешната реалност.
Во својата објава, тој ја отвора и клучната дилема: дали политиката денес е навистина „уметност на управување со општеството“ или е девалвирана во обично средство за освојување и голо задржување на власта?
Одговорот на ова прашање, смета Миноски, лежи исклучиво во профилот на луѓето кои ја практикуваат. Пресудни фактори за тоа во која насока ќе се движи државата се вредносниот систем на политичарите, нивниот личен интегритет, образованието, лидерските способности, како и визијата што ја имаат за иднината.
Завршувајќи ја својата анализа, тој индиректно апелира на поголема одговорност и свест при креирањето на политичката волја, бидејќи крајниот ефект се рефлектира врз секојдневниот живот на граѓаните.
„Клучното прашање не е само што претставува политиката, туку и какви се луѓето што ги избираме, затоа што последиците од политиката ги чувствуваме сите“, заклучува Миноски.
