Премиерот на Северна Македонија, Христијан Мицкоски, изјави дека Законот за употреба на јазиците не може автоматски да се применува во судскиот систем, нагласувајќи дека постои правна разлика меѓу овој закон и Законот за судскиот систем.
Гостувајќи во емисијата „N’Podium“ на телевизијата Ora24.tv, Мицкоски објасни дека Законот за јазиците се смета за општ закон (lex generalis), додека Законот за судскиот систем е посебен закон (lex specialis). Според него, поради оваа правна разлика, двата закона не можат автоматски да се усогласат.
„Законот за јазиците е општ закон – lex generalis, додека Законот за судскиот систем е посебен закон – lex specialis. Не може автоматски да се синхронизира посебен закон со општ закон“, изјави Мицкоски.
Тој исто така оцени дека при донесувањето на Законот за јазиците кај албанските граѓани биле создадени очекувања кои, според него, не се во согласност со препораките на меѓународните институции.
Мицкоски се повика и на мислењето на Венецијанската комисија, нагласувајќи дека во него се посочува оти двојазичноста не треба да се применува во судскиот систем.
Според премиерот, ова прашање во моментов е предмет на разгледување и во Уставниот суд. Тој додаде дека мислењето на Венецијанската комисија е јасно во овој поглед и дека токму тоа ги отвори актуелните дебати околу примената на Законот за јазиците во судството..
