Поранешниот премиер на Република Македонија, Љубчо Георгиевски, на својот Фејсбук профил сподели српски документарен прилог кој се занимава со економската политика и финансиското наследство на поранешна Југославија за време на владеењето на Јосип Броз Тито.
Во објавата, Георгиевски го сподели видеото со краток коментар: „Прекрасна анализа за југословенската економија“. Станува збор за документарец со наслов „Како Тито ја покрал цела Југославија? – Анализа без цензура“, кој се обидува да направи критички осврт на економскиот модел на Социјалистичка Федеративна Република Југославија.
Во видеото се анализираат економските политики, државните финансии и начинот на кој функционирала југословенската економија во периодот по Втората светска војна. Авторите на документарецот изнесуваат тврдења дека системот на државно управувана економија и задолжувањето на државата создале долгорочни финансиски проблеми кои подоцна се одразиле врз економската стабилност на федерацијата.
Објавата на Георгиевски предизвика реакции и дискусии на социјалните мрежи, каде што дел од корисниците ја поддржаа потребата од критичка анализа на југословенскиот период, додека други сметаат дека историските и економските процеси од тоа време треба да се разгледуваат во поширок контекст.
Темата за економското наследство на Југославија и улогата на тогашното раководство и понатаму предизвикува дебати во јавноста, особено во државите кои настанаа по распадот на федерацијата..
