Јавната обвинителка Ленче Ристоска поднесе оставка од својата функција, соопштувајќи дека повеќе не гледа простор да работи во согласност со принципите за кои се залагала во текот на својата кариера.
Во своето образложение, Ристоска истакнува дека функцијата јавен обвинител ја доживувала како можност за реален придонес кон подобрување на правниот систем и зајакнување на владеењето на правото. Сепак, според неа, околностите во кои работела во последниот период значително ја ограничиле таа можност.
Таа посочува дека во текот на работата на високопрофилни случаи се соочувала со сериозни притисоци, влијанија и обиди за попречување на постапките. Како што наведува, јавноста веќе била сведок на притисоци врз сведоци, како и на случаи на застарување на предмети, што дополнително ја нарушува довербата во системот.
Како клучни причини за својата оставка, Ристоска ги наведува и последните одлуки во обвинителскиот систем, кои директно влијаеле врз нејзината работа. Таа открива дека ѝ биле повлечени овластувањата за застапување во дел од клучните предмети, што, според неа, претставува сериозен ризик за нивниот исход.
„Ваквите одлуки носат потенцијални последици за предметите поврзани со висока корупција и организиран криминал“, оценува Ристоска, додавајќи дека во такви услови не може да продолжи да ја извршува функцијата на начин што го смета за професионален и одговорен.
Нејзината оставка отвора нови прашања за состојбите во обвинителството и за предизвиците со кои се соочува правосудниот систем во земјата, особено во делот на справување со висока корупција..
