Во земјава се чувствува изразен недостиг на работна сила во угостителскиот сектор, особено на келнери, бидејќи голем дел од нив заминаа на сезонска работа во Хрватска, привлечени од значително повисоките плати.
Надежта за ублажување на овој проблем се гледа во новиот Закон за работно ангажирање, за кој постои голем интерес, а Министерството за економија и труд континуирано одржува информативни средби во сите региони за да ги појасни неговите придобивки.
Голем интерес, но сè уште малку склучени договори
Заменик-министерот Марјан Ристески истакнува дека одѕивот на овие средби е охрабрувачки.
„Учеството на овие средби е многу големо. Нашата цел е да ги информираме и мотивираме сите заинтересирани од различни сектори како земјоделството, угостителството и услугите. Потоа, Државниот инспекторат за труд ќе започне со примена на законот во пракса“, нагласува Ристески.
Според него, во Агенцијата за вработување веќе се потпишани десетици договори, главно во угостителскиот сектор, иако вкупниот број на апликации сè уште е релативно мал. Ристески уверува дека секој дел од законот што ќе се покаже како непрактичен во реалноста, ќе биде предмет на ревизија.
„Овој закон е дел од реформите поврзани со евроинтеграциите и борбата против неформалната економија. Секоја пречка во неговото спроведување ќе биде идентификувана и, доколку е потребно, ќе се направат соодветни подобрувања“, додава заменик-министерот.
Прилеп со 30 отсто недостиг на кадар во угостителството
Ситуацијата е особено алармантна во Прилеп, каде што недостигот на работна сила во угостителството достигнува околу 30 отсто. Ова се должи пред сè на одливот на сезонски работници надвор од државата. Се очекува празнините да се пополнат со ангажирање млади луѓе и студенти, но ќе се бараат и работници за поспецифичните дефицитарни професии.
Јорданчо Момировски од здружението на угостители „Меанчии“ од Прилеп, ја потврдува сериозноста на состојбата:
„Недостигот на кадар е очигледен. Ни недостигаат келнери, шанкери, готвачи и пица-мајстори. Ќе ги искористиме можностите што ги нуди новиот закон и го чекаме крајот на учебната година за средношколците и студентите, пред сè за позициите келнери и шанкери. За останатите професии, кадар ќе бараме и меѓу невработените или пензионерите.“
За илустрација, само во Прилеп моментно функционираат околу 90 угостителски објекти во кои се вработени над 800 лица.
Што предвидува Законот за работно ангажирање?
Новиот Закон, кој стапи на сила од 1 јануари, овозможува флексибилно сезонско вработување во секторите:
- Угостителство
- Земјоделство
- Услуги
Кој сè може да работи? Законот ги опфаќа младите, невработените лица, пензионерите, како и граѓаните од социјално ранливите категории. Клучната придобивка е што тие можат легално да се регистрираат и да остварат дополнителни приходи, без притоа да ги изгубат постојните социјални бенефиции или пензии.
