Дипломати од бугарската амбасада во Република Северна Македонија, предводени од амбасадорот Жељазко Радуков, заедно со претставници на Бугарскиот културно-информативен центар и на бугарската заедница во земјава, денеска оддадоа почит по повод 123-годишнината од смртта на Гоце Делчев. Делегацијата положи венци на саркофагот на револуционерот во дворот на црквата „Св. Спас“ во Скопје.
За време на чествувањето, бугарскиот амбасадор Радуков одржа говор во кој се осврна на познатата визија на Делчев за светот, но и упати критика за односот кон бугарските државни симболи поставени на венците.
Европска визија наспроти уништување симболи
Амбасадорот потсети на прочуената мисла на Делчев, кој го разбирал светот „како поле за културен натпревар меѓу народите“, нагласувајќи дека иако оваа мисла не е запишана во неговите лични писма или во документите на ВМОРО од тој период, таа е пренесена преку неговите најблиски современици.
„Таа е спомената од Пејо Јаворов – големиот бугарски поет и најблизок пријател на Гоце Делчев. Опишана е од Христо Силјанов, а подоцна пренесена и од писателот Димитар Талев. Тоа е мисла која ја олицетворува свеста на Георги Делчев, која е европска, инклузивна и не е шовинистичка“, истакна Радуков.
Тој посочи дека се сетил на оваа мисла токму поради инцидентите што, според него, редовно се случуваат по нивното заминување од црквата „Св. Спас“.
„Се сетив на оваа мисла бидејќи секоја година, откако ќе ги положиме нашите венци тука, еден час подоцна тробојките се кинат и отстрануваат, и бугарскиот национален симбол го нема. И си дадов сметка за овие т.н. ’заштитници на споменот на Гоце Делчев’ кои го кинат бугарското знаме – дали и тие го разбираат светот како поле за културен натпревар меѓу народите? И како великиот револуционер би гледал на нивните постапки? Поклон пред споменот на еден човек кој бил далеку пред своето време, и како човек, и како Европеец“, изјави амбасадорот пред саркофагот.
Традиционално чествување
Бугарската делегација секоја година традиционално положува венци на гробот на револуционерот, како на денот на неговото раѓање – 4 февруари, така и на денот на неговата смрт – 4 мај.
Георги (Гоце) Николов Делчев е роден во 1872 година во Кукуш. Благодарение на неговите напори, Внатрешната македоно-одринска револуционерна организација (ВМОРО) развива силна активност во Македонија и Одринска Тракија. Загинува во битка на 4 мај 1903 година кај селото Баница...
