Американскиот претседател Доналд Трамп го повикал украинскиот лидер Володимир Зеленски да ги прифати условите на Русија за запирање на војната, предупредувајќи дека Владимир Путин наводно му рекол дека ќе ја „уништи“ Украина доколку не се согласи со договорот. Ова го пренесува Financial Times, повикувајќи се на свои извори запознаени со разговорите.
Жестока средба во Белата куќа
Според извештајот, средбата меѓу двајцата претседатели била исклучително напната. FT прави паралела со претходна средба во февруари, кога Трамп и потпретседателот Џеј Ди Ванс го укориле Зеленски за „недостаток на благодарност“ кон САД.
На последниот состанок, Трамп одбил да ги разгледа картите на фронтот во Украина, барајќи од Зеленски да му го отстапи целиот регион Донбас на Путин. Тој повторувал делови од пораките што рускиот лидер му ги пренел во разговорот претходниот ден, усвојувајќи неколку од неговите тези речиси дословно.
„Путин ќе те уништи“
Еден европски функционер цитиран од FT вели дека Трамп му пренел на Зеленски дека Путин го нарекува конфликтот „специјална операција, а не вистинска војна“, додавајќи дека Украина треба да прифати договор или ќе се соочи со уништување.
„Ти ја губиш војната. Ако Путин ја сака, тој ќе те уништи“, наводно му рекол Трамп, според истиот извор.
Во еден момент, американскиот претседател фрлил настрана мапи од бојното поле, изјавувајќи дека му е „доста“ од нив. „Оваа црвена линија – дури не знам каде е. Никогаш не сум бил таму“, рекол тој.
Контрадикторни пораки за Русија
Според FT, Трамп ја пофалил состојбата на руската економија, велејќи дека „се справува одлично“, иако неодамна јавно изјави дека Путин треба да преговара бидејќи „економијата ќе му пропадне“. Белата куќа и кабинетот на Зеленски не одговориле на барањата за коментар.
Во интервју за Fox News во неделата, Трамп изјавил дека е уверен дека може да стави крај на конфликтот, додавајќи дека Путин „ќе добие нешто – тој веќе има освоено дел од територијата“.
Зеленски без ветени ракети
Средбата се одржала во контекст на нов притисок од Вашингтон за прекин на војната, по склучувањето на примирјето меѓу Израел и Хамас. Украинската делегација дошла во Белата куќа со надеж дека ќе добие американски ракети „Томахоук“ со долг дострел, но Трамп на крајот го одбил барањето.
