Алијанса за Албанците на Арбен Таравари упати јасен и директен апел до премиерот што е можно побрзо да побара од Собранието распишување на предвремени парламентарни избори. Според партијата, ова е единствениот начин да се деблокираат евроинтеграциите, но и да се спасат Албанците во Македонија од, како што велат, погубните политики на коалицијата ВЛЕН.
„Алијанса за Албанците го поддржува и го охрабрува премиерот на земјата што е можно поскоро да го повика Собранието да распише предвремени парламентарни избори, со цел да се олесни и деблокира евроинтегративниот процес на земјата, кој во моментов е заложник на оваа влада“, стои во партиското соопштение на АШ.
„ВЛЕН ги предаде очекувањата на Албанците“
Од партијата на Таравари упатија сериозни обвинувања на сметка на нивните политички опоненти од ВЛЕН, нарекувајќи ги „немоќни претставници“ кои целосно ги изневериле граѓаните кои им ја дале довербата.
Како клучни неуспеси и отстапки на ВЛЕН, од Алијанса за Албанците ги издвојуваат следните точки:
- Укинувањето на „балансерот“: Од АШ обвинуваат дека ВЛЕН презеде одговорност за отстранување на овој механизам, заменувајќи го со „скандалозен“ закон за правична и адекватна застапеност кој ја кочи вистинската реформа.
- Правосудниот испит на албански јазик: Според партијата, оваа политичка групација немала политичка моќ да им овозможи на студентите Албанци да го полагаат правосудниот испит на својот мајчин јазик.
- Газење на ветувањето за уставни измени: Иако лидерите на ВЛЕН декларативно условуваа дека уставните измени се услов за нивно учество во владата и се закануваа со напуштање на коалицијата, тоа не се случи.
- Деградација на албанскиот јазик: АШ обвинува дека со молкот на ВЛЕН е дозволена системска деградација на албанскиот јазик во институциите и институционално потценување на Албанците.
Изборите како единствен излез од блоковите
Алијанса за Албанците смета дека актуелната владина констелација ја води земјата во ќорсокак, особено на полето на надворешната политика и интеграцијата во ЕУ. Според нив, нов изборен циклус ќе ја ресетира политичката сцена и ќе овозможи формирање стабилно мнозинство кое соодветно ќе ги заштити националните и стратешките интереси на сите граѓани..
