Фондот за здравствено осигурување (ФЗО) сериозно ја разгледува можноста за продолжување на породилното отсуство на 12 месеци. Ова го најави генералниот директор на ФЗО, Сашо Клековски, појаснувајќи дека во моментов се прават обемни анализи со кои треба да се утврдат финансиските импликации, но и реалните ефекти од една ваква потенцијална мерка.
Според Клековски, целта на анализата е да се утврди колку честите боледувања кои мајките ги земаат непосредно пред и по породилното отсуство се поврзани со самиот процес на бременост и закрепнување.
„Се обидуваме низ анализата да видиме колку се тие боледувања пред и после породилното поврзани со истиот процес на бременост. Во зависност од тоа, може да видиме како може да го подобриме механизмот, бидејќи ако имаме чести боледувања пред и потоа, според мене треба да мислиме на промени во системот на породилните отсуства“, изјави Клековски.
Крај за рачната обработка: Се воведува нов систем за побрза исплата на породилните
Во однос на честите реакции на граѓаните за доцнење на исплатите на породилното отсуство, првиот човек на ФЗО појасни дека главниот проблем лежи во застарениот начин на работа. Во моментов, сите предмети се обработуваат рачно, но во тек е процес за воспоставување на стандардизиран систем кој трајно ќе го реши овој проблем.
- Рачна обработка: Секое породилно отсуство моментално се обработува поединечно и независно.
- Различни термини: За разлика од пензиите кои се исплаќаат одеднаш, породилните имаат различни датуми на почеток и крај, што дополнително ја усложнува администрацијата.
- Рекордна исплата: Клековски информираше дека во април била извршена рекордна исплата за боледувања, додавајќи дека ФЗО активно работи на автоматизација на пресметките за да се избегнат идни доцнења.
Засилени контроли против лажните боледувања
Паралелно со овие реформи, ФЗО спроведува и детални анализи во секторот за редовни боледувања, каде што веќе се детектирани одредени неправилности и злоупотреби.
Со цел да се заштити буџетот и да се спречат злоупотребите на отсуството од работа, Клековски најави значително зголемување на контролите на терен. ФЗО ќе биде ригорозен во откривањето на т.н. „лажни боледувања“, со што ќе се овозможи средствата да завршуваат кај оние граѓани на кои навистина им се потребни.
