Во гостувањето на телевизијата „Њус-Макс-Балканс“, македонскиот новинар Виктор Канзуров направи длабинска анализа на македонско-бугарскиот спор, посочувајќи дека вината за континуираните недоразбирања е двострана и лежи во нереалните национални наративи кои се негуваат во двете држави.
Според Канзуров, решение за спорот нема да има сè додека постојат две клучни пречки: македонското негирање на бугарскиот идентитет на историските дејци од една страна, и бугарското неприфаќање на процесот на создавање на македонската нација од друга.
Осврнувајќи се на македонската историографија, тој критикуваше дека во земјава се негува наратив кој постојано ја вини Бугарија за сè, притоа правејќи целосна ревизија на историските факти.
„Додека секогаш Бугарија за сѐ е виновна и уште поважно додека за личности како браќа Миладинови, Кузман Шапкарев, Гоце Делчев, Јане Сандански, Даме Груев им се негира бугарскиот идентитет и дури историскиот расказ во Република Северна Македонија прави од нив анти-бугари и обратно“, нагласи Канзуров.
Сепак, новинарот упати остра критика и кон официјална Софија, посочувајќи дека и нивниот пристап кон реалноста е подеднакво проблематичен. Според неговите зборови, Бугарија мора да ја разбере и признае реалноста на теренот.
Како што посочува Канзуров, проблемите ќе траат „додека од бугарска страна не се прифати македонската етнонационална интеграција во Народна, потоа Социјалистичка Република Македонија, а потоа само Република Македонија, додека не се прифати како еден процес“.
Со ваквиот став, Канзуров јасно порачува дека излезот од политичкиот и историскиот ќор-сокак бара суштинско соочување со вистината од двете страни на границата – Скопје да престане со антибугарската слика за револуционерите и преродбениците, а Софија конечно да го признае процесот на формирање на современата македонска нација и држава.
