Европратеникот Андреј Ковачев предлага воведување нов чекор во постапката за добивање бугарско државјанство – сите апликанти да бидат фотографирани пред државното знаме и грбот на Бугарија. Според него, ваквата церемонија би ја нагласила симболиката и почитта кон државата, но и би придонела за поголема транспарентност.
Ковачев потсетува дека лицата кои бараат бугарски пасош веќе мора да го докажат своето бугарско потекло и да потпишат документ со кој изјавуваат дека се чувствуваат како етнички Бугари. Тој смета дека фотографирањето и јавниот регистар за сите кои стекнале државјанство би бил следниот логичен чекор.
„Треба да се воведе церемонија со фотографија за институционална комеморација пред знамето и грбот, како знак на почит и свеченост. Истовремено, јавниот регистар ќе обезбеди транспарентност“, изјави европратеникот за „24 часа.бг“.
Во интервјуто, Ковачев – член на владејачката партија ГЕРБ – зборуваше и за Македонија и нејзиниот европски пат. На прашањето дали очекува промени во политиките на Скопје или можен европски притисок врз Софија да го прифати ставот на Македонија, тој порача дека е „апсурдно да се верува во такво нешто“.
Изјавите на Ковачев повторно ја отвораат дебатата околу процесот за добивање бугарско државјанство, како и чувствителните односи меѓу Скопје и Софија во контекст на европските интеграции.
